Basadi, lwa reng?: UBC Contracted

Synopsis

Basadi, lwa reng? ke padi e e thadisang ka ga dikgwetlho di le mmalwa tse Batswana ba itemogelang tsona mo botshelong jwa segompieno. Thitokgang e ama dintlha di tshwana le sekgajaja sa HIV/Aids, boimana jwa bašwa, tiriso ya diritibatsi, tiriso e e botlhaswa ya basadi ga mmogo le pipamolomo e e ratwang bobe ke badiredipuso. Setlhogo sa padi se maleba mme e bile se gwetlha basadi go ema ka dinao, go bopa mekgatlho ya go lwela ditshwanelo tsa bona le go itshereletsa kgatlhanong le go jewa ntsoma. Basadi ba tshwanetse go nna matlhagatlhaga, ba nonofe ba bo ba nne pelotelele fa ba batla go fitlhelela ditlhologelelo tsa bona. Kedibone o tlhagiswa jaaka moanelwamogolo yo maikaelelo a gagwe e leng go thusa basadi ba ditshwanelo tsa bona di gatakiwang ka dinao. Kedibone o lemoga se morago ga go jewa ntsoma ke Basinyi. Ka setlhogo Basadi, lwa reng? mokwadi o botsa potso e karabo ya yona e fitlhelwang mo ditiragalong tsa padi. Mosadi o botsa basadi gore a mme go siame gore ba dirisiwe ke banna ka maipato a lorato jaaka Kedirile a dirisitswe ke Basinyi? Moanelwamogolo Kedibone o tsaya maikarabelo a go bula basadi matlho gore ba ikemele, fa ba sa batle go thanya lomapo le le tsebeng. Thitokgang e nngwe e e fitlhelwang mo pading e ke ya bolaledi le bosenyi. Ditiro tsa bosenyi di tlhagisitswe sentle, ka moanelwa Basinyi. Basinyi ke leferefere la lenweenwee le le dirang ditiro tsa bosenyi ka matsetseleko. Jaaka go twe leina lebe seromo, mo go Basinyi leina le ile boreelelong. O tsieditse Kedibone le Kedirile ka maaka le bonweenwee. O na le baemedi kwa sepodising le kwa boemafofaneng. O na gape le babueledi ba dikgeleke. Bolaledi bo tlhagisiwa sentle tota. Le fa mapodisi a se na dikoloi tse di lekaneng le didiriswa dingwe tsa botlhokwa, a bonala a tlhoafetse mo tirong ya ona ya go tshwara disenyi. Mokapotene Kebareng o tlisa tsholofelo le fa tota Lefapha la Sepodisi le aparetswe ke mathata a bobodu le boferefere. Baanelwa ba padi e ke ba madi le nama jaaka batho ba re tshelang le bona. Go na le baanelwabagolo gammogo le baanelwabannye. Ditiragalo dikgolo di totile baanelwabagolo mme baanelwabannye ba thusa go aga maitshetlego a padi. Mokwadi o tlhagisa ditiragalo tse di kitlaneng sentle, ka poloto e e itogileng semelemethe jaaka noga. O dirisitse puo ya bontshwantshi e gogelang. Buisa o tle o ijese monate!

Copyright:

2011

Book Details

Book Quality:

Excellent

Book Size:

168 Pages

ISBN-13:

9781868886548

Publisher:

Unisa Press

Date of Addition:

04/23/21

Copyrighted By:

Department of Basic Education

Adult content:

No

Language:

Tswana

Has Image Descriptions:

No

Categories:

Literature and Fiction

Submitted By:

Ntungufhadzeni Muguru

Proofread By:

Ntungufhadzeni Muguru

Usage Restrictions:

This is a copyrighted book.